السلام عليكم🌷
شكرًا على الدعم الكبير وباذن الله راح احاول افيدكم بكل شيء اعرفه 💫💜
موضوع التيشيرتات انا لسا جالسة ابحث عن شيء خامته كويسة وسعره كويس عشان اقدر ابيعه بسعر معقول، لكن فيه ثلاث طرق اعرفها للطباعة على التيشيرتات.
الطريقة الاولى:
الطباعة بالـ infusible ink وهو الحبر الحراري، باختصار الحبر مع الحرارة يتفاعل مع القماش ويصير جزء منه يعني مايصير محسوس بالتيشيرت زي الvinyl ومايروح ابدا بالغسيل.. دا نفس اللي جالسة احاول اسويه في متجري، بس دا النوع من الطباعة للاسف مايزبط الا على الاقمشة المُعالجة، يعني ما ينفع مع الاقمشة اللي ١٠٠٪ قطن. فيه مقاطع باليوتيوب يقدمون طرق طباعة على القطن بنفس دا الحبر بس لسا ما طبقت حاجة منها وما اعرف صراحة لو حيزبط. مبدئيًا لو تبغو تطبعو بدي الطريقة لازم القماس يكون بوليستر ١٠٠٪ او قطن مخلوط ب على الاقل ٦٥٪ بوليستر. (polyster)
بالنسبة للـ infusible ink بحد ذاته عندكم ٣ خيارات:
١- اقلام infusible ink من شركة كريكت ودا شكلها.
٢- infusible ink sheet من شركة كريكت برضو ودا شكلها. (فيه اشكال والوان مليانة اكتبو بالبحث infusible ink sheets)
٢- طابعات تطبع بـ حبر حراري ودا بالنسبة ليا احسن خيار لكن حاليًا ماعندي ميزانية لان اللي شفتها سعرها ٢٥٠٠ ريال. انا ما عندي خلفية ايش احسن وحدة بس اللي حاطة عيني عليها اسمها Sawgrass SG500. تقدرون تبحثون عن طابعات تدعم الـ sublimation.
- مقطع يوتيوب شرح طريقة الطباعة بالحبر الحراري - ورق حراري
- مقطع يوتيوب شرح طريقة الطباعة بالحبر الحراري - اقلام حبر حراري
الطريقة الثانية:
الطباعة باستخدام الـ vinyl ودي الطريقة انا شايفة انو الاغلب بيستخدمها، سهلة ونتايجها حلوة برضو.. بس لو حتستخدمو دي الطريقة باعتقادي لازم يكون عندكم جهاز قص الكتروني سواءً كريكت او كاميو، انا شخصيا عندي كريكت سهلة جدًا بالاستخدام وماعرفت كاميو الا من تيك توك.
الكريكت فيه ٣ انواع اتكلمت عنها بمقطع في حسابي التيك توك، هنا بحط لكم الexplore air مناسبة للي بيسوي مشاريع زي التيشيرتات.
فيه منها الوان دي بعضها: لون المينت ، لون التوايلايت، لون الليلك.
برضو يفضل يكون عندكم مكبس الحرارة، تقدرون طبعًا تستخدمون جهاز المكواه العادي، لكن المكبس راح يسهّل عليكم لان تقدرون تعايرون الحرارة وعدد الثواني
فيه ثلاثة مقاسات لمكبس الحرارة من كريكت
١- الصغيرة ٦ في ٧ انش
٢- الوسط ٩ في ٩ انش
٣- الكبيرة ١٠ في ١٢ انش
شخصيًا انا اشتريت الوسط لاني احسها مناسبة ليا كبداية، بس فيه وحدة كبيرة من شركة تانية اشوفها بتيك توك كتير يستخدمونها، او تقدرون تبحثون بانفسكم عن اجهزة الـ heat press.
بالنسبة ليا عيب دي الفينيل انه بعد زمن سنة سنتين ثلاث راح يخرج اكيد عكس الطريقتين التانين..
* نقطة مهمة للي يبي يستخدم الطريقة دي، اتاكدو ان الفينيل ناقل للحرارة وينفع للاقمشة زي في الوصف هنا.. لان فيه انواع مختلفة للفينيل مثلا اللي ينحط على الزجاج او الخشب وغيره.
* انا برضو اشتريت المات حق المكبس الحراري لانها تمتص الحرارة والرطوبة وسطحها مستوي فيسهّل عملية الطباعة.
- مقطع يوتيوب شرح طريقة الطباعة بالفينيل
الطريقة الثالثة:
طباعة الـ screen print اكتشفتها من تيك توك ومره عجبتني بس ماعندي معلومات كافية عنها لسا، بس اللي اعرفه ان الحبر تقريبًا نفس اول واحد ومايروح طول العمر
برضو لو استخدمتو دي الطريقة راح تحتاجو مكبس حرارة تحطوه بدرجة معينة على الحبر بعد ما يجف عشان يصيز جزء من القماش.
الحلو في دي الطريقة ان تقدرون تطبعون حتى على الأقمشة الغامقة عكس الـ infusible ink يكون باهت على الأقمشة الغامقة. برضو ميزة تانية حلوة انو تقدرو تطبعو على اقمشة ١٠٠٪ قطن!
هنا عدة الـ screen print ، بالنسبة للالوان ماعندي خلفية للأمانة لكن لقيت دي في امازون وشكلها كويسة.
*تحديث*
بعد البحث بشكل اكبر لقيت انو الاغلب بيمدح شركة speedball وعلى الاغلب دي اللي حشتريها انا. في امازون مالقيت لون اسود ومالقيت الوان كتيرة بس موجودة في جرير.. واتاكدو انو مكتوب عليها طباعة على الأقمشة.
انا عاجبني مره الـ screen print وجالسة افكر اني ابحث عنه اكتر وابدا استخدمه، عاجبتني فكرة انه مستحيل يتاثر ويجلس مدى حياه التيشيرت.✨
- فديو يوتيوب طريقة الطباعة بـ screen print
اختارو الطريقة الأنسب لكم وانطلقو 🤝💕
ان شاء الله يكون البوست مفيد لكم، شاركوه مع اي شخص حابب يبدأ بزنس طباعة على التيشيرتات عشان يستفيد.💕
ليست هناك تعليقات: